كل ما يخص روتين العناية بالشعر الكيرلي للأطفال
كأمهات بيهمنا كل التفاصيل اللي تخص اطفالنا من أول الاهتمام باحتياجاتهم النفسية والاهتمام بتعليمهم وصحتهم وتقويم سلوكهم لحد الاهتمام بمظهرهم ولبسهم، والاهتمام بشعرهم جزء أساسي من العناية بمظهرهم وصحتهم، عشان كده تعليم اطفالنا إزاي يحبوا ويهتموا بشعرهم الكيرلي من الحاجات المهمة جدا اللي مفروض نبتدي نشتغل عليها من وهما صغيرين، ومهم نثقف نفسنا ونقرأ عن أساليب العناية بالشعر الكيرلي للأطفال.
في المقال ده هنتكلم في نقاط مختلفة تهم كل أم عندها طفل شعره كيرلي.
أساسيات روتين الشعر الكيرلي للأطفال
1- تسليك الشعر الكيرلي وهو مبلول فقط
فك تشابك الشعر الكيرلي بيكون وهو مبلول وعليه البلسم أثناء الشاور أو وهو عليه كريم التصفيف (Leave-in Cream) بعد الشاور، تجنبي تماما تسرحيه وهو ناشف لأنه هيتقطع وهيهيش وهيسبب ألم لفروة راس طفلك.
2- استخدام كمية بلسم اكتر من كمية الشامبو
الشامبو بينضف فروة الرأس بس الكتير منه بينشف الشعر وبيزيل كل الزيوت الطبيعية اللي فروة الراس بتفرزها، بنستخدم منه بما يعادل عقلة صباع على الفروة فقط، لكن البلسم بيرطب الشعر وبالتالي بيسهل عملية فك التشابك، بنستخدم منه الكمية اللي محتاجها الشعر لفك التشابك على خصلات الشعر فقط.
3- احمي شعرهم اثناء النوم
اغلب الاطفال بيتحركوا كتير اثناء النوم؛ عشان كده قبل النوم مهم نلم الشعر لفوق بتوكة ستان ناعمة من غير ما نشده، وبننام على مخدة ستان عشان نقلل الهيشان وتشابك الشعر اثناء النوم.
4- تجنبي الفوطة العادية لتجفيف الشعر الكيرلي
منشفة الجسم العادية بتحسب كل الترطيب من الشعر الكيرلي فبتسبب جفاف وهيشان، عشان تتجنبي المشكلة دي نشفي شعرهم بتيشيرت قطن تكوني مخصصاه للغرض ده بس، أو فوطة مايكروفايبر.
5- اختاري تسريحات تحمي الشعر الكيرلي من الهيشان والتعقيد
– خصوصا في أوقات المدارس – زي الـ mini twists أو الضفاير الكتير، التسريحات دي بتحمي الشعر لحد الغسلة اللي بعدها وفي نفس الوقت بتخلي الشعر يفضل مهندم لحد وقت طويل ممكن يوصل لخمس ايام.
بشرة وشعر الاطفال حساسين بشكل كبير، عشان كدا الاطفال من عمر يوم لسن سبع سنوات مينفعش نستخدملهم نفس المنتجات اللي بنستخدمها لنفسنا؛ لأن المنتجات المخصصة لشعر الأطفال بتحتوي على مكونات وزيوت طبيعية وبتكون لطيفة على الشعر وفروة الرأس.
عشان كدا مهم نتأكد أنها مخصصة للأطفال وخالية من المواد الكيميائية القاسية، خصوصا الشامبو بيكون خالي من سلفات الصوديوم ومتعادل الحموضة فبيمنع الدموع وبيحافظ على عيون أطفالنا أثناء الشاور.
منتجات الاطفال ممكن نستخدمها لنفسنا مع ولادنا عادي – خصوصا لو شعرنا كيرلي زيهم – بس ممنوع نستخدملهم المنتجات بتاعتنا.
ومهم جدا ناخد بالنا هل المنتج اللي بنستخدمه مناسب لسن طفلنا ولا لا؟ لأن في منتجات بتكون مناسبة وآمن للاستخدام من عمر يوم، ومنتجات تانية بتكون غير آمنة نستخدمها قبل 3 سنين، عشان كدا كنا مهتمين جدا في كيرلي سيكرتس نوضح في تفاصيل كل منتج هو مناسب للأطفال من سن كام.
طريقة غسل الشعر الكيرلي والتسليك الصحيحة
كل ما عرفنا ازاي نغسل ونفك تشابك الشعر الكيرلي بطريقة صح، كل ما كان يوم غسل الشعر أسهل علينا وعلى طفلنا وتجنبنا العادات اللي ممكن تسبب تلف للشعر او تقطعه او تسبب ألم للطفل أثناء التسريح.
1- اثناء غسل الشعر:
وقت الشاور مهم جدا في روتين الشعر الكيرلي للأطفال وبيسهل علينا الخطوات اللي بعدها..
- بنبدأ بغسل الفروة بشامبو مخصص للأطفال، بنعمل مساج لفروة الراس لمدة دقيقة والشعر نفسه مفرود لورا، خطأ شائع اننا نكوَم الشعر لفوق ونفضل نفرك فيه عشان ينضف كويس، للاسف الطريقة دي بتعقد الشعر وبتخليه صعب انه يتسرح بسهولة بعد الشاور.
- لو الشعر بيجف ويتشابك بعد الشامبو ، مهم جدا نستخدم بلسم أو حمام كريم آمن على الاطفال ونبتدي نفك بصوابعنا – بطريقة لطيفة عشان مانشدش الشعر – أي تشابك ممكن يكون موجود؛ عشان نساعد ان وقت التسليك بعد الشاور يمر بسلام بدون أي صراعات.
2- بعد غسل الشعر:
- أول وأهم خطوة هو أننا نبتدي نسلك الشعر بعد الشاور على طول وهو مبلول، لأنه بمجرد ما ينشف بدون ترطيب هيبتدي يتعقد زيادة ولما نبتدي نسلكه هيتقطع ويتقصف وهتبتدي معركة احنا في غنى عنها.
- سواء لشعرك او شعر طفلك، تجنبي الفوطة العادية لتجفيف الشعر لأنها بتهيشه وتقصفه وتسحب منه كل الترطيب، اعتمدي في الخطوة دي على تيشيرت قطن تكوني مخصصاه بس لتجفيف الشعر.
- بنستخدم كريم للتصفيف (leave in cream/conditioner) يكون مناسب لنوع وكثافة شعر الطفل، وبنقسم الشعر لاجزاء وبنبتدي نسلك كل جزء لوحده، التسيلك يكون بفرشاة سنونها واسعة ونوعها كويس مش بيتكسر ولا بيقطع الشعر.
- فك التشابك بلطف ومن تحت لفوق مش العكس – خصوصا لو البنت شعرها طويل – عشان نتفادى العقدة الكبيرة اللي بتتكون في أطراف الشعر وعشان نشيلها بالمشط أو الفرشاة الشعر بيكون اتقطع والبنت اتعرضت لألم في فروة راسها.
تسريحات الشعر وفقرة تسريح كل يوم الصبح قبل المدرسة
عشان شعر طفلك يفضل صحي ولتجنب أي تلف أو أضرار على المدى البعيد ابعدي عن تسريحات الشعر أو الضفاير اللي بتخلي الشعر مشدود جامد من فروة الراس، اتعاملي بلطف مع شعرهم لأن شد الشعر جامد بيخليه ينحل من فروة راسهم الامامية وبيسبب تقصف وبالتالي هيشان في الجزء الامامي من الشعر.
لو من قواعد المدرسة ان الشعر يكون ملموم او يتعمل تسريحة معينة:
- انتي مش محتاجة تسلكي الشعر كل يوم الصبح، زي ما اتفقنا ان كل نوع شعر ليه معاملة مختلفة وإن الشعر الكيرلي مش بيتسرح نهائي وهو ناشف لأنه هيتقطع ويهيش، فانتي تقدري تعملي أي تسريحة والشعر كيرلي وناشف زي ما هو، وممكن تستخدمي نقطتين من أي سيروم مكون من زيوت طبيعية للتحكم في الهيشان.
- النوم على مخدة ستان والشعر مرفوع لفوق بتوكة واسعة هيساعد كتير في تقليل الهيشان والتعقيدات اللي بتحصل اثناء النوم.
- بنغسل الشعر مرتين في الاسبوع بالشامبو ولو احتاجنا نغسله أكتر من كدا بنعمل حمام زيت قبل غسل الشعر بنص ساعة عشان نحمي الشعر من تأثير الاستخدام المتكرر للماء والشامبو.
| بنفكرك دايما إنك أم جميلة، لأن بالرغم من كل الضغوط اليومية اللي بتمري بيها بس مهتمة تعرفي أكتر ازاي تعتني بشعر طفلك على طبيعته ❤ |
لو انتي مامي شعرها مش كيرلي؟
لو شعرك مفرود وبنتك شعرها كيرلي، فـ انتي اكيد بتعاني في التعامل مع شعرها لأنك اكيد بتعامليها نفس معاملة شعرك، بس الواقع ان شعركوا انتوا الاتنين مش نفس النوع فبالتالي مستحيل نفس طريقة العناية تجيب نفس النتيجة النهائية.
بس ماتقلقيش خالص الموضوع مش معقد أبدا، زي ما بنكون مهتمين أننا نعرف ونتعلم إزاي نتعامل معاهم في كل مرحلة عمرية، وإزاي نهتم بصحتهم ومظهرهم، مهم جدا اننا نهتم بشعرهم ونتعلم إزاي نتعامل معاه لانه جزء مهم من مظهرهم وصحتهم وحتى شخصيتهم.
العناية بالشعر الكيرلي مش محتاج أدوات غالية ولا عشرات المنتجات اللي لازم تستخدميهم فوق بعض، هي خطوات بسيطة بمجرد ما تتعودي عليها وتعرفي ايه المنتجات، التسريحات، طريقة التصفيف اللي بتنفع مع شعر بنتك/ابنك، هتشوفي بنفسك قد ايه الموضوع مش معقد لكن محتاج صبر زي أي حاجة لسه بنبتدي نعرفها ونتعلمها جديد.
في النهاية..
- هتحتاجي يكون عندك صبر وسعة صدر انك ممكن تجربي منتجات وماتنفعش مع نوع شعر بنتك/ابنك ف هتضطري تجربي غيرها لحد ما توصلي لأحسن نتيجة ممكنة مع شعرهم الكيرلي، في النهاية احنا بنعمل كل ده عشان صحة ولادنا.
- وعشان نكون واقعيين، الشعر الكيرلي ممكن يكون بيحتاج عناية اكتر من الشعر المفرود، بس ده مش معناه ان الموضوع معقد.
- الفكرة كلها أننا بيعدي علينا سنين طويلة بنتعامل مع الشعر بطريقة غلط او بنستخدم منتجات ممكن تكون ضررها اكبر من نفعها، فلما نيجي نعرف معلومات جديدة ونغير كل ده في الأول هنحس أن الموضوع كبير بس مع التكرار بيبقى “روتين”، وهيبقى عقلك بيعمل الخطوات دي من غير بذل أي مجهود في التفكير.
كل ما يخص روتين العناية بالشعر الكيرلي للأطفال Read More »
