روتين العناية بالشعر الكيرلي في 3 خطوات
كتير من البنات اللي طبيعة شعرهم كيرلي مش بتكون عايزة تبدأ روتين العناية بالشعر الكيرلي، وتستسهل فرده بالمكواه أو البروتين عشان مفكره أنه عملية طويلة ومعقدة ومحتاجة وقت ومجهود كبير كل يوم .. لكن دا مش حقيقي خالص!
روتين العناية بالشعر الكيرلي بمجرد ما تتعودي عليه هيبقى جزء من حياتك وعاداتك الاسبوعية اللي مش هتحسي بيها اصلا وانتي بتعمليها.
في المقال ده هنبسط ليكي خطوات روتين العماية بالشعر الكيرلي في 3 خطوات بس أساسية هتخلصيهم في متوسط ٣٠ دقيقة (أو حسب طول وكثافة شعرك)، وهتعرفي من خلاله إزاي تهتمي بشعرك على طبيعته وتخليه مترطب وصحي ويفضل معاكي لحد الغسلة اللي بعدها بنفس الشكل.
1- الخطوة الأولى: غسل الشعر الكيرلي (متوسط 10 دقائق)
- الشعر الكيرلي بطبيعته بيميل أنه يكون جاف، عشان كدا لو فروة راسك جافة ومش بتعاني من قشرة أو أي أعراض مرضية، مهم جدا تستخدمي شامبو خالي من السلفات والمواد الكيميائية اللي بتشيل كل الزيوت الطبيعية من الشعر (إلا في حالة أن فروة راسك دهنية، وقتها بتستخدمي شامبو يحتوي على سلفات على الفروة فقط).
- لو شعرك شديد الجفاف أو مسامية عالية، استخدمي شامبو خالي من السلفات على فروة الرأس فقط؛ شعرك نفسه كدا كدا هينضف من بقايا الشامبو اللي هينزل على شعرك وانتي بتشطفيه من الفروة، وبعد ما تشطفيه رطبي باقي شعرك بالبلسم بعد ما تسيبيه على شعرك من 3-5 دقايق.
- ممنوع تمشيط او تسليك الشعر الكيرلي بالمشط أو الفرشاة أثناء غسله لأن الشعر بيكون في أضعف حالاته؛ ودا بيعرضه للتساقط والتقصف.
- قبل نهاية الخطوة دي اتأكدي انك غسلتي شعرك كويس جدا من أي منتجات موجودة فيه سواء شامبو أو بلسم عشان تتجنبي القشرة والتساقط وتراكم المنتجات على شعرك.
عشان تسهلي على نفسك فك تشابك الشعر الكيرلي، أثناء الشاور حركي صوابعك بلطف ما بين شعرك والبلسم محطوط عليه وحاولي بإيدك تفكي أي تعقيدات ممكن تكون موجودة فيه، من غير استخدام أي مشط أو فرشاة.
2- الخطوة الثانية: الترطيب العميق للشعر الكيرلي (متوسط 30 دقيقة اسبوعيا)
- أهم خطوة في روتين العناية بالشعر الكيرلي هي ترطيبه بعمق، واستخدام حمام الكريم المناسب لنوع واحتياجات شعرك باستمرار من مرة لمرتين في الاسبوع حسب نوع شعرك ومدى احتياجه للترطيب.
- الخطوة دي بيهملها بنات كتير لأنهم مفكرين أنها محتاجة وقت طويل وشخص فاضي، لكن زي ما قولنا من شوية إن الشعر الكيرلي بطبيعته بيحتاج للترطيب المستمر عشان كدا دي خطوة مهمة جدا ومش بتتعمل كل يوم.
- حمام الكريم أو ماسك الترطيب العميق يستخدم بعد خطوة البلسم على شعر نظيف ومغمور بالمياه، ولتجنب التساقط ابعدي عن فروة راسك وانتي بتحطي حمام الكريم، ابدئي بعد 3 سم من جذور الشعر.
- مدة الماسك بيكون من نص ساعة لساعة اسبوعيا، وتقدري وقتها تلفي شعرك ببونيه او شاور كاب وتعملي اي حاجة تانية محتاجة تعمليها قبل الشاور. وعشان نسهلها عليكي في كيرلي سيكرتس جمعنالك هنا حمامات الكريم اللي شعرك الكيرلي ممكن يحتاجها، وكل منتج هتلاقي فيه كل تفاصيله ومكوناته وطريقة الاستخدام.
3- الخطوة الثالثة: تصفيف الشعر / Styling (متوسط 20 دقيقة)
- اخر خطوة في روتين العناية بالشعر الكيرلي ولا تقل أهمية أبدا عن الخطوتين اللي قبلهم، وعشان توصلي للنتيجة اللي بتشوفيها في الصور ومع البلوجرز، اهتمي بالخطوة دي لأن أولا الشعر بيفضل على الهيئة اللي اتساب ينشف عليها، ثانيا هي اللي بتبين جمال الكيرلي وطبيعة شعرك.
- اقسمي شعرك جزئين أو أربع اجزاء حسب كثافته، ووزعي كريم التصفيف “Leave-in Cream” على شعرك وابدئي سلكي كل جزء لوحده لفك أي تعقيدات أو تشابك.
- فك تشابك الشعر الكيرلي بيبدأ من تحت لفوق مش العكس، ويفضل تستخدمي مشط أو فرشاة واسعة عشان ماتقطعش الشعر ويكون سنونها خشب أو سيليكون.
- بعد ما ترطبي شعرك بكريم التصفيف “Leave-in Cream” مهم إنك تستخدمي جل خصوصا في فصل الصيف عشان يثبت الكيرلي ويقلل الهيشان ويحفظ الترطيب.
أحلى حاجة ممكن تعمليها لنفسك هو أنك تحبيها، وتتقبلي كل حاجة فيها زي ماهي بما فيه شعرك الكيرلي، نفسك هتشكرك بعدين.
- الـ styling ليه طرق كتير جدا، بس أسهلهم كوقت ومجهود هو استخدام فرشاة تحديد الشعر الكيرلي، استخدامها هو أنك بتمسكي كل خصلة تسريحها بالفرشاة، اللي بتعمله الفرشاة دي هي إنها بتفرق كل مجموعة شعر لوحده عشان تكون خصل كيرلي مظبوطة ومتحددة من غير هيشان .. تقدري تشوفيها من هنا.
- بعد كده بتقلبي شعرك كله لتحت وبتعمليله scrunching (بتضغطي شعرك من الاطراف لفوق بكف ايدك) بأي تيشيرت قطن عندك مخصصاه لتنشيف شعرك او فوطة مايكروفايبر؛ احنا بالحركة دي بنعمل 3 حاجات مهمين:
1- بنمتص أي منتجات زيادة الشعر مامتصهاش ومش محتاجها.
2- لو في أي خصل لسه مفرودة بنساعدها تاخد شكلها الكيرلي الطبيعي بتاعها.
3- بيمتص حوالي 20-40% من المياه الموجودة في الشعر فبيقلل وقت التجفيف.
- اخر خطوة في الـ styling وفي روتين العناية بالشعر الكيرلي هي تجفيف الشعر، وفي هنا اختيارين يا إما بتسيبيه ينشف في الهوا أو بتستخدمي السشوار “ديفيوزر” على البارد أو أقل درجة حرارة ممكنة.
دلوقتي بعد ما غسلنا ورطبنا شعرنا وعملناله styling عايزين نحافظ على الكيرلز لحد ميعاد الغسلة اللي بعدها!
5 نصائح للعناية بالشعر الكيرلي والحفاظ عليه من الهيشان والتشابك
1- الشعر الكيرلي بمجرد ما ينشف ممنوع تماما يتسرح بأي أداة، بنسرحه مع كل غسلة زي ما قولنا من شوية في الروتين.
2- قبل النوم بنرفع شعرنا وبنلمه لفوق (زي الاناناسة) بتوكة ستان ناعمة بحيث نقلل احتكاكه بالمخدة، وعموما أيا كان نوع شعرنا غلط ننام عليه لازم نرفعه لفوق عشان نقلل من فرص التقصف والهيشان والتشابك.
3- زي ما معروف أن القطن بيمتص الرطوبة بسهولة وبالتالي بيسبب هيشان؛ عشان كدا لو عايزين نحافظ على الكيرلي أثناء النوم يفضل ننام على كيس مخدة ستان بدل القطن.
4- مش بنكلكع الشعر تحت الحجاب خالص! بنلمه كحكة بتوكة واسعة تحت البندانة ولما بنفك الحجاب بنسيب الشعر يتنفس من غير ما نلمه.
5- في بداية روتين العنية بالشعر الكيرلي، في اليوم التاني أوالتالت ممكن نحتاج نعمله ريفريش، طريقته هي إننا بنملى بخاخة مياه يفضل مفلترة وبنضيف عليها شوية من الـ leave-in اللي بنستخدمه ونرجها عشان يدوب، وبنرش منها على الشعر وبنعمله scrunching بايدينا ولو بيهيش من الايد يبقى بتيشيرت قطن.
أسئلة بنتسألها كتير
شعري كيرلي اغسله كام مرة بالشامبو في الاسبوع؟
على حسب نوع شعرك وفروة راسك، لكن في العموم يفضل غسل الشعر بالشامبو من مرة لمرتين في الاسبوع في فصل الشتاء، ومن مرتين لثلاث مرات في الاسبوع في فصل الصيف، مع مراعاة استخدام الشامبو المناسب للفروة ونوع الشعر.
لازم استخدم حمام كريم كل مرة اغسل فيها شعري؟
لا مش لازم، ممكن تكتفي بترطيب الشعر بالبلسم بعد الشامبو، ولكن يفضل استخدام حمام الكريم مرة في الاسبوع.
هو غلط اسيب شعري الكيرلي يجف في الهوا ولا لازم اجففه بالسيشوار "diffuser" ؟
مفيش صح وغلط على حسب اللي يريحك، الديفيوزر اكيد بيجفف الشعر في وقت أقصر خصوصا في فصل الشتاء، ولكن لو معندكيش ديفيوزر أو مش بتحبي تستخدميه عادي تسيبي شعرك ينشف في الهوا، أهم حاجة تجنبي تلمسيه أو تلعبي فيه وهو لسه مبلول.
لسه في بداية الروتين وشعري بيبوظ من تاني يوم، اعمل ايه؟
لو الكيرلي بيبوظ وبيتفك من تاني يوم، السر هو الاستمرارية والصبر. مع مرور الوقت والاستمرار على الروتين هيفضل مستمر معاكي لحد رابع وخامس يوم، ولما يستعيد كامل صحته هيفضل معاكي لحد اسبوع كويس والكيرلز إلى حد كبير محتفظة بشكلها!
هل روتين العناية بالشعر الكيرلي بيختلف من الكبار للأطفال؟
أساسيات العناية بالشعر الكيرلي مش بتختلف من الكبار للأطفال، ولكن اختيار المنتجات المناسبة وطرق العناية بيه بتختلف، تقدري تشوفي من هنا كل ما يخص روتين العناية بالشعر الكيرلي للأطفال.